நியூசிலாந்து பயணம்! - Day 9

2023 ஆம் வருடத்தின் இரண்டாம் நாள், எங்கள் சுற்றுலாவின் ஒன்பதாவது நாள். இன்று நாங்கள் இரண்டு விளையாட்டுகளுக்கு முன்பே திட்டமிட்டு முன்பதிவு செய்து இருந்தோம். முதல் கட்டமாக ஸ்கை லைன் குயின்ஸ் டவுன்(Skyline Queenstown) என்ற இடத்தில் அமைந்துள்ள Luge என்று அழைக்கப்படும் வண்டியில் சவாரி செய்வது.

ஸ்கை லைன் குயின்ஸ் டவுன் மிகவும் உயரமாக அமைந்திருப்பதால் அதனை எளிதாக சென்றடைய கண்டோலா(Gondola) அமைத்திருக்கிறார்கள். உங்களுக்கு மலையேற்றத்தில் ஆர்வம் இருந்து, அதற்கான உடல் தகுதியும் இருந்து, மேலே ஏறுவதற்கு தேவையான 2 மணி நேரமும் இருந்தால், நீங்கள் நடந்தே மேலே ஏறி வரலாம். எங்களுக்கு மலையேற்றத்தில் ஆர்வமும் இருந்தது; அதற்கான உடல் தகுதியும் இருந்தது; ஆனால் மேலே ஏறுவதற்கு தேவையான 2 மணி நேரங்கள் இல்லை. அதனால் நாங்கள் கண்டோலாவை முன்பதிவு செய்திருந்தோம். அந்த கண்டோலா வழியாக, ஸ்கை லைன் குயின்ஸ் டவுன் சென்றடைந்தோம்.

லூஜ் என்பது அடிபக்கமாக சக்கரங்கள் பொருத்தப்பட்டு, மிதிவண்டியில் உள்ளது போல அந்த வண்டியை திருப்புவதற்கும் நிறுத்துவதற்கும் கைப்பிடியும், brake-ம் பொருத்தப்பட்டு இருக்கும். அந்த வண்டியை சற்று உயரமான இடத்தில் இருந்து இயக்க ஆரம்பித்தால் அது கீழ்நோக்கி மிகவும் வேகமாக வந்து சேரும்.

கீழே வரும் வழி வளைந்து நெளிந்து செல்வதோடு, சில இடங்களில் சற்றே நம்மை உயரத் தூக்கி வீசுவது போலவும் அமைந்திருக்கும். அந்த உயரமான இடத்திற்கு நாம் ஒவ்வொரு முறையும் நடந்து செல்ல வேண்டிய அவசியம் இல்லை. அதற்கென தனியாக மின் தூக்கி நாற்காலிகளை(Chair Lift ) அமைத்திருக்கிறார்கள். கீழே இருந்து அந்த நாற்காலியில் நாம் அமர்ந்து கொண்டால் அது நம்முடன் சேர்த்து அந்த Luge கலையும் மேலே எடுத்துக் கொண்டு செல்கிறது. 

நம் விருப்பத்திற்கு ஏற்றவாறு ஒவ்வொருவரும் மூன்று, ஐந்து, ஆறு, அல்லது பத்து என எத்தனை சவாரிகள் வேண்டுமானாலும் பதிவு செய்து கொள்ளலாம். நாங்கள் ஒவ்வொருவருக்கும் ஆறு சவாரிகள் முன்பதிவு செய்து இருந்தோம். 

கோமதி மூன்று சவாரிகள் மட்டும் ஆடிவிட்டு மீதமுள்ள சவாரிகளை எங்களுக்கு கொடுத்து விட்டார். அனைவரும் ஆடி முடித்த பின்பு வீட்டிலிருந்து சமைத்து எடுத்து வந்திருந்த உணவை, அங்கேயே உட்கார்ந்து சாப்பிட்டோம்.

மதிய உணவிற்குப் பிறகு ஜிப்லைன்(zipline) விளையாட்டினை முன் பதிவு செய்திருந்தோம். இந்த விளையாட்டில் சில படிநிலைகள் வைத்திருந்தார்கள். அதில் நாங்கள் முன்பதிவு செய்தது ஏழு வயது உள்ள குழந்தைகளும் ஈடுபடும் எளிமையான படிநிலை கொண்ட ஜிப் லைன். 

ஜிப் லைன் என்பது உயரமான இரண்டு இடங்களை இரும்பு கயிற்றினால் இணைத்து, ஒரு சக்கரம் அந்த இரும்பு கயிற்றின் மேல் சுழன்று கொண்டே அந்த இரண்டு உயரமான இடங்களுக்கு நடுவே பயணிப்பது போல் அமைத்திருக்கிறார்கள். அந்த சக்கரத்துடன் இணைக்கப்பட்ட தடிமனான கயிறு, நமது உடலில் கட்டப்பட்டுள்ள சேனத்துடன்(Harness) இணைக்கப்படுகிறது. நாம் அந்தக் கயிற்றைப் பிடித்துக் கொண்டோ, பிடிக்காமலோ தொங்கும்போது, நமது உடல் எடையின் காரணமாகவே அந்த சக்கரம் இழுத்துக் கொண்டு உயரமான இடங்களுக்கு நடுவே பயணிக்கிறது. இதனால் நாம் ஆகாயத்தில் பறப்பது போன்ற ஒரு சிலிர்ப்பூற்றும் அனுபவத்தை கொடுக்கின்றது.

ஜிப்லைன் விளையாட்டுக்கு நம்மை வழிகாட்டும் பொறுப்பாளர் பெண்மணிகள், ஜிப்லைன் அமைந்திருக்கும் காட்டினைப் பற்றியும், குயின்ஸ்டன் நகரத்தை பற்றியும், சில தகவல்களை நம்முடன் பகிர்ந்து கொண்டே வந்தார்கள். குயின்ஸ்டன் நகரம், சுற்றுலாவுக்கான நகரம் என்பதால், நகரத்தில் தங்கி பணி செய்யும் மக்களை விட, சுற்றுலா வாசிகளிடமிருந்து அதிக வாடகை பெறலாம் என்பதால், அங்கிருக்கும் மக்கள் தங்கள் வீட்டினையோ அல்லது வீட்டின் ஒரு பகுதியையோ, சுற்றுலா வாசிகளுக்கு airbnb மூலமாக வாடகைக்கு கொடுப்பதையே விரும்புகின்றனர். இதனால் நகரத்தில் தங்கி பணி செய்யும் மக்களுக்கு அவ்வளவு எளிதாக வீடுகள் கிடைப்பதில்லை. அதே நேரம் கொரோனா காலத்தில் சுற்றுலாப் பயணிகள் யாரும் வருகை தராததால் அந்த நகரம் ஒரு பேய் நகரமாக(Ghost Town) காட்சியளித்தது என்றும் கூறினர்.

ஜிப்லைன் விளையாட்டுக்கு எங்கள் குழுவில் அமெரிக்காவிலிருந்து ஒரு இந்திய குடும்பம் வந்திருந்தது மேலும் இந்தியாவிலிருந்தும் ஒரு குடும்பம் அதில் கலந்து கொண்டது. நாங்கள் அவர்களுடன் அறிமுகம் செய்து கொண்டோம். 

ஆனால் அதற்குப் பின்பு ஒரு பெரிய சோதனை காத்திருந்தது. ஸ்கை லைன் ஸ்டோன் இடத்தில் இருந்து அடிவாரத்திற்கு செல்ல முன்பதிவு செய்திருந்த கண்ட்ரோலா ஏதோ தொழில்நுட்பக் கோளாறு காரணமாக நின்று விட்டது. நாங்களும் ஒரு மணி நேரத்திற்கு மேலாக காத்திருந்து  பார்த்தோம். ஆனால் அந்தக் கோளாறு சரி செய்யப்படவே இல்லை. 

மேலும் அவர்கள் ஏற்பாடு செய்த பேருந்து அனைவரையும் கீழே அழைத்துச் செல்ல மிகவும் காலதாமதம் ஆகும் என்பதால், உடல் வலிமையுடன் உள்ளவர்களை, நடந்து செல்லுமாறு அறிவுறுத்தினர். மேலே ஏறுவது தான் கடினம், கீழே செல்லும் பாதை எளிதாகவே இருக்கும், நீங்கள் விரைவாக சென்றடைந்து விடலாம் என்றும் கூறினர். 

ஜிப்லைன் விளையாடி முடித்ததும் அன்று முன்பதிவு செய்து இருந்த விளையாட்டுக்கள் அனைத்தும் முடிவுக்கு வந்ததாலும், அடுத்ததாக நாங்கள் வீட்டுக்குச் சென்று ஓய்வெடுக்க தான் போகிறோம் என்பதாலும், நாம் நடந்தே செல்லலாம் என்று முடிவு செய்து நாங்கள் நடக்கத் தொடங்கினோம்.

கீழே நடந்து செல்லும் வழியில் ஒரு 25 வயது மதிக்கத்தக்க ஒரு ஆஸ்திரேலிய பெண்மணி, தனது கால் பிசகி விட்டதாகவும் ஆனால் தன்னால் மேற்கொண்டு நடக்க முடியாது என்றும் அழுது கொண்டு அமர்ந்திருந்தார். நான் அவரிடம் நீங்கள் கலங்காதீர்கள்; நான் கீழே சென்றடைந்த உடன், ஸ்கைலைன் குயின்டவுன் நிர்வாகத்தினரிடம் உங்களை அழைத்து வருவதற்கு ஆள் அனுப்புவதற்கு ஏற்பாடு செய்கிறேன் என்று ஆறுதல் கூறினேன்.

அவர் எவ்வளவு தொலைவில் இருக்கிறார் என்பதை தெரிந்து கொள்வதற்காக அந்த இடத்தில் இருந்து எனது அலைபேசியில் ட்ராக்கர் செயலியை தொடங்கிவிட்டு நடக்கத் தொடங்கினேன். கீழே சென்றடைந்த உடன், ஸ்கைலைன் குயின் ஸ்டோன் பணியாளர்களை சந்தித்து, வழியில் ஒரு பெண்மணி கால் பிசகி நடக்க முடியாமல் அழுது கொண்டு உட்கார்ந்திருக்கிறார், அவர்  என்னுடைய ட்ராக்கர் செயலியின் படி, கீழே இருந்து 600 மீட்டர்கள் தொலைவில் உள்ளார் என்பதை தெரிவித்தோம். அவர்களில் மூன்று பேர் உடனே அவரை மீட்டு வருவதற்காக புறப்பட்டனர், நாங்கள் எங்கள் வீட்டை நோக்கி புறப்பட்டோம்.

 இன்றைய பொழுது இத்துடன் இனிதே முடிந்தது!