Part 4 - பயணச் சீட்டு... 08-Jan-2019

சற்றுநேரம் காத்திருந்த பிறகு, விமானத்தில் ஏறுவதற்கான அழைப்பு வந்தது...முதலில் வணிக வகுப்பினர் மற்றும் தொடர் பயணியரை அழைத்தனர். சிறிதுநேரம் கழித்து பொது பிரிவினருக்கான அழைப்பு வந்தது. அன்று சிட்னியில் மழை பெய்துகொண்டிருந்த படியால், அனைத்து பயணியரையும் விமானத்தின் முன்வாசல் வழியாகவே வர அறிவிப்பு வந்தது. முதலில் இருக்கை எண் 20 முதல் 30 வரை உள்ள பயணியர், பிறகு 10 முதல் 19 வரை உள்ள பயணியர்.

முன்புறம் அமர்ந்திருக்கும் பயணியரின் கால்களை இடறிவிடுவதை தவிர்க்கவும், பயணியர் தமது பைகளை தமக்கான அலமாரியில் வைத்து இருக்கையில் அமரும்வரை, பின்வரும் பயணிகள் காத்திருக்க வேண்டியதை குறைக்கவும், அவ்வாறான ஏற்பாடு.

எனது இருக்கை எண் 29 என்பதால் பொதுப்பிரிவில் முதலிலேயே அழைப்பு வந்தது. நான் எனது பையினை அதன் கைப்பிடி பற்றி இழுத்துக்கொண்டே நடந்தேன். எனது பயணசீட்டை சரிபார்த்த பிறகு, விமானத்தின் முன்புற வாயிலை காற்று பாலத்தின்(airbridge :) ) வழியே அடைந்தேன். காற்றுப்பாலத்தில் இருந்து விமானத்தினுள் எனது பையினை இழுத்துக்கொண்டே செல்ல முடிந்தது. விமானத்தினுள் நுழையும்போது, ஒரு பணியாளர் மீண்டும் எனது பயணச்சீட்டை பரிசோதித்தார்.

பிறகு என் இருக்கை நோக்கி எனது பையினை அதன் கைப்பிடி பற்றி இழுத்துக்கொண்டே நடந்தேன். வணிக வகுப்பின் இரண்டாவது வரிசையில் அமர்ந்திருந்த பயணியின் காலில் எனது பையின் சக்கரங்கள் இடறியது. விமானத்தின் இரு புறங்களுக்கு இடையேயான இடைவெளி மிகவும் குறைவு என்பதால், எனது பையினை தூக்கிக்கொண்டு சென்றுவிடுவது சிறந்தது என்றெண்ணிய நான் அதை தூக்கினேன்.

'ஐயோ! என்ன இது? எனது பையின் பளு சற்று குறைந்து இருக்கிறதே!'. பாதுகாப்பு சோதனை முடிந்து இதுவரை எனது பையினை அதன் கைப்பிடி பற்றி இழுத்துக்கொண்டே வந்துள்ளேன். அதனால்தான் அதன் பளு குறைந்துள்ளது என்பதை நான் உணரவேயில்லை.

அப்படியானால் பாதுகாப்பு சோதனை முடிந்து எனது மடிக்கணினியை எடுத்து வைத்தேனா? இல்லையா? அவசரம் அவசரமாக இடதுபுற இருக்கைக்குள் ஒதுங்கி, எனது பையினை பரிசோதித்தேன். அங்கே எனது மடிக்கணினி இருக்கவில்லை!

தொடரும்...